ភ្នំពេញ៖ ក្រសួងការងារនិងបណ្តុះបណ្តាលវិជ្ជាជីវៈ បានអនុញ្ញាតឱ្យកម្មករនិយោជិតឈប់សម្រាកក្នុងពិធីបុណ្យអុំទូករយៈពេល៣ថ្ងៃ ចាប់ពីថ្ងៃទី៧-៩ ខែវិច្ឆិកាឆ្នាំ២០២២ ខាងមុខនេះ។ ក្រសួងបានប្រាប់ឱ្យម្ចាស់រោងចក្រ និងសហគ្រាសអនុញ្ញាតឱ្យកម្មករឈប់សម្រាកដោយមានប្រាក់ឈ្នួល។

ក្រសួងការងារបានបញ្ជាក់ថា រោងចក្រ និងសហគ្រាសណាដែលមិនអាចបញ្ឈប់សកម្មភាពបាន បើកាលណាអនុញ្ញាតឱ្យកម្មករឈប់សម្រាក ធ្វើឱ្យខូចប្រយោជន៍ដល់សាធារណជន ម្ចាស់រោងចក្រ និងសហគ្រាសនោះត្រូវបែងចែកឱ្យកម្មករនិយោជិតឈប់សម្រាកទៅតាមថ្ងៃបុណ្យដោយមានការផ្លាស់វេនគ្នា ឬឈប់សម្រាកខុសពីថ្ងៃបុណ្យ ក្នុងករណីមានការព្រមព្រៀងគ្នារវាងកម្មករនិយោជិតសាមី និងនិយោជក។

ក្រសួងការងារបានប្រាប់ឱ្យម្ចាស់រោងចក្រ និងសហគ្រាសទាំងអស់ត្រូវរៀបចំបញ្ជីឈ្មោះកម្មករនិយោជិតដែលត្រូវផ្លាស់ប្តូរគ្នាឈប់សម្រាកតាមកាលបរិច្ឆេទនីមួយៗខាងលើ និងរក្សាទុកជាប្រចាំសម្រាប់ការត្រួតពិនិត្យរបស់អធិការការងារ។

សូមរំលឹកថា រាជរដ្ឋាភិបាលបានផ្អាកប្រារព្ធពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំនេះ ដោយសារតែកម្ពុជាមានភារកិច្ចដ៏សំខាន់គឺរៀបចំកិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំកំពូលពាក់ព័ន្ធ។ តែយ៉ាងណានៅតាមបណ្តារាជធានីខេត្តមួយចំនួនបាន និងកំពុងត្រៀមរៀបចំពិធីបុណ្យអុំទូកផងដែរ៕